د پکتیکا ولایت معلولین وايي، چې تر اوسه دولت ورته هیڅ پاملرنه نه ده کړې او له نیږدې ټولو حقونو بې برخې دي.
د ډسمبر دریمه د معلولینو نړیواله ورځ پکتیکا کې د سويډن کمېټې او د دې ولایت د شهیدانو او معلولینو امریت له لوري پداسې حال کې نمانځل کېږي، چې د یاد ولایت معیوبین له ګڼو ستونزو خبر ورکوي او زیاتوي، چې په ټوله کې افغان دولت تر اوسه ورته هیڅ پاملرنه نه ده کړې او دوی یې هېر کړي دي.
د ښرنې اوسېدونکی ارسلاح وايي، نیږدې یو کال کېږي، چې معاشونه یې ندي اخیستې او له سختې ناچارۍ سره مخ دي.
نوموړی زیاتوي، ۱۴ کاله کېږي چې معیوب دی، خو حکومت تر اوسه یوازې ورته ټاکلې اندازه تنخوا ورکوي او نور هیڅ مرسته یې ورسره نده کړې.
د سلطانو کلي اوسېدونکی غازي وايي، چې نور له دولت څخه مایوسه شوي او آن په خپل وخت معاش هم نه ورته رسېږي.
د هغه په خبره:(( د نورو ولایتونو معیوبینو ته ډېر سهلتونه برابر شوي، دولت ورته یوه یوه نمره ځمکه، د تګ راتګ وسایل او د کار و بار سهولتونه برابر کړي. هغوی په ښارونو کې کوچني تجارتونه کوي او د خپل ځای او کورنۍ لپاره یوه مړۍ ډوډۍ پیدا کوي، خو موږ له دې ټولو حقونو نه بې برخې یو.))
غازي زیاتوي، که دولت ورسره لیږ همکاري هم وکړي، کولای شي ډېر کار وکړي او د نورو د اوږو بار نشي.
د دې تر څنګ پکتیکا کې د معیوبینو د ټولنې مشر هڅاند هم د دوی په حقونو ټينګار کوي او زیاتوي، چې د قانون له مخې دولت باید د ټولنې دغه قشر ته کار وکړي او کاري فرصتونه ورته ایجاد کړي.
هغه وايي، قانون هغو معلولو کسانو ته چې لوستي وي، ۳ سلنه په دولتي ادارو کې د دندې اجرا کولو حق ورکړی، خو تر اوسه دغه حق ورته ندی رسېدلی.
قومي مشر حاجي پاچاخان شرانوال هم وايي، ډېری معلولین لدې شکایت کوي، چې په خپل وخت ورته معاشونه نه رسېږي او په میاشتو، میاشتو ځنډېږي.
د پکتیکا ولایت د شهیدانو او معلولینو امر هم د هغوی دغه ستونزې منې، خو ژمنه کوي، چې په نیږدې راتلونکي کې به د دې ولایت پاتې نیمايي معیوبینو ته هم د معاشونو د وېش لړۍ پیل شي.
مرستیال والي شېرباد شاه ارګونی معیوبینو ته د کمې پاملرنې لوی لاملونه د هېواد روانې ناخوالې او جګړه بولي، خو زیاتوي چې دولت به هڅه وکړي، تر څو د ټولنې د دغه طبقې اکثریت مشکلاتو ته رسیدګې وکړي.
د یادونې وړ دی، چې پکتیکا کې ټول ټال ۸۱۴ تنه معلولین شتون لري، چې له جملې یې ۳۵ تنه نظامي او پاتې نور هغه یې بیا ملکي وګړي دي چې د جګړو او نورو لاملونو له امله ورته ځاني زیان رسېدلی او اوس مهال له یو عالم مشکلاتو سره د بې وسۍ ژوند پر مخ وړي.
