شېرخان بندر چې افغانستان له منځنۍ اسیا سره نښلوي او کندز ولایت یې له اقتصادي ارزښت برخمن کړی په دې وروستیو کې د ګمرک ریاست او سوداګرو ترمنځ ناندریو یې په عوایېدو منفي اغېز کړی.
سوداګر وايي، کارو بار په دې بندر کې کم شوی او اړ دي چې خپلې پانګې له کندز او شیرخان بندره وباسي.
دوی وايي، چې دلته ټول مسوولین په فساد کې غرق دي، دولتي مامورین د ګمرک له دولت معاش اخلي، خو بیا هم که مونږ پیسې ورنه کړو بیا مو څو ورځې موټر په دې بندر کې ولاړ وي.
سوداګر وايي، څوک چې قانوني کار کوي لس ورځې یې موټر بار ولاړ وي او څوک چې رشوت ورکوي کار یې په ګمرک کې ژر خلاصېږي.
سیدمجتبی هاشمي د سوداګرو د اتحادیې مشر بیا په ځينو برخو کې نېغ په نېغه خپله سوداګر ملامتوي او دا هم مني، چې په دې بندر کې ستونزې شته او سوداګر ورسره لاس او ګرېوان دي.
ښاغلی هاشمي وايي: (( سوداګر هم ملامت دي خامخه په ګمرک کې ستونزې وي او کله ناکله ماموین هم ستونزې جوړوي، خو تر دې حده زیاتې نه دي چې شکایت دې ترې وشي، سوداګر هم ملامت دي یوازې د ګمرک مامورین هم نه دي ګرم)).
د سوداګرو او ګمرک ترمنځ ناندریو په دې بندر کې کارګران بې کاره کړي او شکایت د کارګرو دا دی چې د پخوا په پرتله اوس ډېرو کمو ته کار پیدا کېږي او نور وزګار ګرځي.
کارګر ګل احمد وايي: (( مونږ حیران یو وړاندې مو هره ورځ تر زر افغانیو کار کاوه، خو له کومې ورځې چې دلته د سوداګرو او ګمرک تر منځ جنجالونه او ناندرۍ پیل شوې مونږ هم بېکاره یو)).
هڅه مو وکړه، چې په دې تړاو د کندز د ګمرک نظر هم له ځانه سره ولرو، خو له بار بار ټېليفوني اړيکو نيولو سره يې زمونږ اړيکه ځواب نه کړه.
یاده د وي چې شېرخان بندر د هېواد په شمال ختیځ زون کې یوازينی ستر ترانزېټي او تجارتي بندر دی چې افغاني توکي له همدې لارې د خرڅلاو لپاره د منځنۍ اسیا هېوادونو ته صادرېږي او د افغانستان لپاره اړین توکي بیا ددې بندر له لارې د منځنی اسیا له هېوادونو څخه را واردېږي.
