د پکتیا ولایت بڼوال وایي، چې د نورو کلونو په پرتله یې سږ کال د مڼو په حصلاتو کې زیاتوالی راغلی، خو دوی د دغو حصلاتو د ساتنې په برخه کې د سړو خونو نشتوالی لویه ستونزه یاده کړي.
بڼوالو له اړوند ریاست غوښتنه کړې، چې د حصلاتو د ساتنې او خرڅلاو لپاره دې ورته مناسبې سړې خونې جوړې کړي.
د یاد ولایت د کرنې ریاست مسولینو هم د بڼوالو په مخ کې شته ستونزې منلي او ډاډ یې ورکړی، چې راتلونکي کال کې به د اړتیا سره سم ورته سړې خونې جوړې شي.
د پکتیا ولایت په مرکز او احمد ابا ولسوالۍ کې د نورو میوه لرونکو بوټو سربېره په زیاته کچه د مڼو باغونه شته، چې بڼوال ترې هر کال ښه حصلات لاسته راوړي، د نورو کلونو په نسبت سږ کال د مڼو په حصلاتو کې زیاتوالی راغلی، بڼوال یې وايي حصلات یې ډیر دي، خو د ساتنې او خرڅلاو لپاره مناسب ځایونه او بازار نلري.
دوی زیاتوي، چې هر کال ترې د سړو خونو د نشتوالي له امله زرګونه منه مڼې خرابیږي، چې د ګټې پرځای ورته تاوان ورسیږي.
یاد بڼوال له کرنې وزارت او دلته په پکتیا کې له اړوند ریاست څخه غوښتنه کوي، چې د دوی د مڼو لپآره دې ورته سړې خونې جوړې کړي، تر څو یې دوی په مناسب وخت د خرڅلاو لپآره بازار وړاندې کړي.
بڼوال حاجي ولي جان وايي: (( مونږ دلته داسې سړې خونې نلرو، چې دا خپل حصلات پکې وساتو، سږ کال مو د مڼو حصلات ډیر ښه و، خو د ساتنې او خرڅلاو لپاره بیا مناسب ځای نلرو، غوښتنه مو دا دی چې کرنې ریاست دې مونږ ته دلته سړې خونې جوړې کړي، تر څو دا خپلې مڼې پکې وساتو.))
او روف خان بیا داسې وايي: (( سږ کال مونږ د مڼو له ونو ډیر ښه حصلات درلودل، خو لویه ستونزه دا ده، چې مونږ سړې خونې نلرو، دا اوس هم ټول مصارف له خپله جیبه کوو، که د دوا حساب شي او که بل کوم شی پکار شي، تر اوسه مونږ سره کرنې ریاست هیڅ همکاري ندی کړې.))
د دې ولایت د کرنې اوبو لګولو او مالدارۍ ریاست مسولین هم د سړو خونو کمښت په دې برخه کې یوه لویه ستونزه بولي او وايي، که دوی د تازه میوو لپاره سړې خونې ولري، نو د بزګرانو او بڼوالو په مخ کې شته ستونزې به تر ډیره هواره شي.
د کرنې ریس محمدالدین مومند وايي، هڅه یې پیل کړې تر څو پکتیا کې د میوه جاتو د ساتنې لپاره سړې خونې جوړې کړي، تر څو بڼوال خپل حصلات پر وخت خرڅلاو ته وړاندې کړي.
محمد الدین مومند د پکتیا د کرنې اوبو لګولو او مادارۍ ریس وویل: (( دا چې تر اوسه مونږ کوم لومړني معلومات په دې برخه کې را غونډ کړي، نو د مڼو په حصلاتو کې شل سلنه زیاتوالی راغلی دی.
د سړو خونو نشتون په ریښتیا هم دا یوه لویه ستونزه ده، خو مونږ خپلې هڅې پیل کړی او تر ریس جمهوري پورې مونږ د دې غوښتنه کړې، مونږ ته هم ډاډ راکړل شوی دی، چې راتلونکي کال کې به یو شمېر سړې خونې جوړې شي.))
بل لورته بیا د پکتیا د سوداګرۍ او صنایعو خونې ریس نصیر علمیار د وچو او تازه میوو لپاره د بازار نشتون لویه ستونزه یادوي او وايي، که حکومت ورته د ځمکني دهیلز زمینه برابره نکړي، نو په دې برخه کې به شته ستونزې همداسې پاتې وي.
نصیر عالمیار د پکتیا د سوداګرۍ او صنایعو خونې ریس وايي: (( تر اوسه پورې دولت هم دا توانايي نلري چې مناسب بازار جوړ کړي، له مونږ سره ریس جمهور هم دا وعده کړې وه، چې قزاکستان کې دوی بازار پیدا کړي او له پاکستان سره چې مونږ کومه پوله لرو، نو هغوی هم خپله تعرفه لوړه کړې ده، نو حکومت دې یوازې په هوايي دهلیز دا نه کیږي، باید چې زمیني دهلیز جوړ شي.))
د کرنې ریاست د مسولینو په وینا چې سږ کال په پکتیا ولایت کې د مڼو په حصلاتو کې شل سلنه ډیروالی راغلی دی.
